Jólakort frá útlöndum

Heil og sæl kæru vinir og kunningar. 

Siðasta ár hefur verið verulega viðburðaríkt hjá okkur hjónunum. Sigga bauðst vinna í London og flutti þangað í mai. Ég lauk BSc prófi í tæknifræði og ávað að halda áfram námi og reyna við masterinn. Verðmiðinn á náminu réði því að ég lenti í Danmörku þannig að við hjónin höfum verið í fjarbúð meira og minna síðan í maí en hittumst svona u.þ.b. einu sinni í mánuði.

Þegar leið að jólum kom í ljós að Siggi þarf að vinna alla daga í kringum hátíðar svo það var ekki í boði að taka frí og heimsækja Ísland. Jólin höldum við þvi tvö saman hér í London og hugsum hlýtt til fjölskyldunnar okkar, ekki síst barnanna okkar og þeirra fjölskyldna. 

Við erum búin að kaupa hamborgarhrygginn og ýmislegt fleira góðgæti, nokkrir pakkar eru komnir í hús og einhverjir eiga eftir að bætast við. Það mun því ekki væsa um okkur þó auðvitað verði þetta mikil viðbrigði og við komum til með að sakna þess jafnvel meira en venjulega að geta ekki hitt fjölskylduna okkar.

Til þeirra sem vanir eru að fá jólakort frá okkur: Einhvern vegin urðu jólakortin útundan þetta árið. Svona mitt á milli þess að reyna að ljúka prófum og undirbúa för frá Danmörku til London, gleymdust þau hreinlega! Ég er reyndar búin að kaupa gasalega fín kort en þau urðu þau eftir í Danmörku þannig að það er ekki heldur hægt að gera úr þeim áramótakort. Það er því spurning hvort við gerum úr þeim páskakort, sendum 2 kort um næstu jól eða spörum okkur kortakaup á næsta ári og notum bara þessi?

En til ykkar allra: Bestu jólakveðjur til ykkar allra með von um að þið hafið það sem allra best og gleðilegt nýtt ár!

Þessi rós sem rembist við að blómstra hér utan við dyrnar hjá okkur á Þorláksmessu er gott dæmi um breyttar aðstæður hjá okkur þessi jól.

Uppskrift að sjónvarpssokkum

Fyrir nokkru datt mér í hug að prófa að prjóna sjónvarpssokka eins og ég man að langamma mín prjónaði þegar ég var lítil. Ég hef ekki séð svona sokka í mörg, mörg ár en þeir eru rótsniðugir svona uppí sófa þegar maður er að horfa á sjónvarpið eða að lufsast um heima hjá sér í rólegheitum.

Eftir að við Siggi fluttum út kom í ljós bráð þörf fyrir svona sokka. Húsakostur og kyndin er örlítið öðru vísi en við erum vön og gólfkuldi alþekkt fyrirbæri. Ég er því búin að hafa það af að prjóna 2 pör af svona sokkum og er bara nokkuð sátt með sjálfa mig! Um daginn fékk ég svo fyrirspurn um uppskriftina svo ég tók mig til og setti mína útgáfu niður á blað. Ég studdist við uppskrift sem ég fann á netinu en fannst hún svolítið ruglingsleg og svo er ég ekki heldur neitt voðalega dugleg að fara eftir uppskriftum. :)

Hér kemur svo uppskriftin:

Sjónvarpssokkar

Uppskriftin er byggð á uppskrift frá Ístex (www.istex.is)

Sokkarnir eru úr Léttlopa og prjónaðir á prjóna nr. 6, þá verða sokkarnir frekar grófir.

Fitja upp 60 lykkjur, þá ná sokkarnir ca. upp á miðjan legg.  Ef fitjað er upp 80 lykkjur verða þeir vel háir.

Prjóna 4 umf. slétt prjón (1 pr slétt, 2 pr brugðið). Í annari hverri umferð er á enda prjóns (þeim megin sem keðjulykkjan er ekki) aukið út um 1 lykkju 3 sinnum. Þegar 4 umferðir eru búnar er prjónað garðaprjón (slétt í báðar áttir). Þá er gott að skipta um lit og prjóna 2-3 rendur (eða eins margar og manni sýnist) með öðrum lit. Skipt er um lit þeim megin sem aukið var út.

Fyrsta lykkja er alltaf tekin óprjónuð fram af prjóninum. Þeim megin sem byrjað var að fitja upp er lykkjan tekin fram af með bandið framan við lykkjuna, þá myndast keðjulykkja á efri brún sokksins. Hinum megin er lykkjan tekin fram af eins og ætti að prjóna hana.

Þegar búið er að prjóna nógu langt er endað með eins röndum og í upphafi og endað á að prjóna jafn stóran sléttan kafla og í upphafi. Muna að taka úr 3 lykkjur eins og aukið var út í byrjun. Geymið lykkjurnar á prjóni eða setjið þær á band.

Saumið saman sokkinn á tánni frá réttu þannig að rendurnar passi saman. (Mér finnst þægilegast að fela endana áður en ég sauma sokkinn saman.) Dragið síðan afganginn af tánni saman með því að þræða í gegnum jaðarinn og festa. Sokkurinn er síðan lykkjaður saman að framan.

Ístex mælti með því að prjóna sokkinn saman (hef ekki prjófað það) þannig: Snúa röngunni út og prjóna sokkinn saman: Prjóna sl. Í 1. L á prj samtímis og prj er í 1. L uppfitjunarinnar, þarnæst í 2. L bæði á prj og uppfitjun og fella af á vanalegan hátt. Þetta er gert út allan prjóninn.

Viðbót: Nú er ég búin að gera prufu með að prjóna sokkana saman eins og uppskriftin frá Ístex segir til um. Það er alveg ágæt aðferð en það er mun fallegra að lykkja þá saman og verður ekki stíft á samskeytunum.

Fara eða vera?

Í dag skrapp ég í "Kringluna" í Lyngby. Þar villtist ég fram og aftur um gangana og alveg pakkað af fólki svona svipað og stuttu fyrir jól heima á Íslandi. Kannski af því það er lokað flesta sunnudaga? Ég sá margt fallegt og bráðnauðsynlegt sem mann vantar ekki neitt eins og tildæmis alveg hrúgu af fallegum skóm í Bianco. Sá líka buxur úr flaueli í einni gellubúðinni. Er flauel að koma aftur? Ég fór til að kaupa buxur sem ég fann ekki en tókst samt að eyða góðum slatta af peningum.

Búin að kaupa mér rosa flottan síma sem ég get ekki ennþá notað hann af því mig vantar í hann sim kort. Fékk í morgun kort frá símafyrirtækinu en þeir afgreiddu mig vitlaust og sendu mér venjulegt kort en ekki micro-sim eins og ég pantaði þannig að nú þarf ég að fá þá til að senda mér nýtt án þess að rukka mig aftur. Gaman að sjá hvernig það fer.

Helstu pælingarnar okkar Sigga þessa dagana eru hvort ég á að fara til London í október eða hann að koma til mín? Mig vantar að fá hann hingað til að setja upp og stilla router og hann þarf náttúrulega líka að sjá hvernig ég bý. Ég fæ hins vegar viku frí í skólanum í október þannig að ég gæti farið þangað í rúma viku. Hins vegar stefnir allt í að það verði slatti af verkefnum sem ég þarf að vinna í fríinu svo kannski er ekkert sniðugt að fara neitt. Verst að við getum ekki bara gert hvort tveggja en flugfélögin passa mjög vel að ódýru fargjöldin eru ekki boði í kringum helgar þegar líklegt er að maður geti nýtt þau.

Kirkjan í Lyngby þar sem ég fer úr strætó þegar ég fer í  miðbæinn (ef ég hjóla ekki)

Villingurinn

Ég er skelfilegur villingur.

Eftir að ég kom hingað til Danmerkur hef ég villst um allt! Ég hef tekið strætó í öfuga átt og reddað mér með því að fara í heilan hring með honum. Hefði gert það líka á fyrsta degi í skóla ef það hefðu ekki verið fleiri úr húsinu að fara sömu leið og ég.

Ég hef staðið vegalaus úti á götu og ekki haft hugmynd um hvert ég átti að fara og þurft að hringja og láta lóðsa mig á réttan stað.

Eftir að ég fékk mér reiðhjól - alvöru damecyckel - og fór að hjóla í skólann tókst mér að fara fyrstu 3 ferðirnar milli skóla og heimilis ranga leið. Mér tókst nú samt alltaf að enda á réttum stað! Þetta varð reyndar líka til þess að ég vissi hvar pósthúsið er þegar ég þurfti svo að fara þangað nokkrum dögum seinna.

Nú er ég búin að panta mér nýjan síma sem er með gps og kortum í svo ég geti fundið réttu leiðina næst þegar ég gerist villingur! :)

Fína hjólið mitt sem kemur mér á milli staða - stundum reyndar lengri leiðina :P

Danskar marvöruverslanir

Danskar matvöruverslanir eru mjög sérstakar.

Það er ekkert verið að spá í skipulag í mörgm verslunum. Ekki er ólíklegt að rekast á sams konar vörur á tveimur mismunandi stöðum í versluninni. Vörunum getur líka allt eins verið hrúgað í körfur eða hillur þar sem kúnninn á að finna þær.

Vöruúrvalið er líka einkennilegt. Við fyrstu sýn virðast Danir helteknir af hollustu. Brauðmeti er yfirleitt mjög gróft, lítið og lélegt úrval er af morgunkorni (líka hollu) og allt sem er sætt er rándýrt (sykurskattur). Svo gengur maður aðeins lengra inn og þá er hálf verslunin full af áfengi á spottprís! Það er t.d. ekki óalgengt að ½ ltr af gosi jafnvel meira en tvöfalt dýrari en bjórinn og vatnið er líka dýrara en bjórinn – sem þó er búinn til úr vatni! Veit ekki hver hollustan er í því að borða gróft brauð og skola því svo niður með öli. Og 1/2 ltr af gosi kostar 20-25dkr sem eru ca. 4-500 íslenskar krónur!

Ég hef ákveðnar efasemdir með umhverfismerktu vörurnar í búðunum. Ég keypti t.d. egg sem eiga að vera úr hænum sem ganga frjálsar (free range). Skurnið á harðsoðnu eggi var svo pikkfast á að eggið fór meira og minna í tætlur. Þegar skurnið var loks farið af kom í ljós að rauðan (gulan?) var fölari en nokkur eggjarauða sem ég hef á æfinni séð og vita bragðlaus! Hænurnar sem verptu þessum eggjum hafa alveg áreiðanlega aldrei komist í tæri við ferskan arfa eða nokkuð annað ferskt.

Danir eru líka skrýtnir

Nú eru komnar 3 vikur í Danmörku og ég er ekki frá því að mér finnist fleira skrýtið hér en í Bretlandi.

• Hér er unnið frá 9 til 5. Ekki orð um það meir. Ef eitthvað bilar utan þess tíma eða um helgar þá verður bara að hafa það.
• Skrifræðið er ótrúlegt. Mér gekk ágætlega að fá kennitölu og um leið og hún var komin þá hrúgaðist inn hjá mér póstur um hitt og þetta sem ég á að gera fyrir batteríið eða batteríið gerir fyrir mig. Ég er líka búin að vera í 2 vikur að stofna bankareikning. Vona að það hafist eftir helgi.
• Á Íslandi er ekki borin virðing fyrir hjólreiðafólki. Hér er borin mikil virðing fyrir því en gangandi fólk virðist helst eiga að halda sig heima við. Ekki óalgengt að við hliðina á götu og hjólastíg sé örmjór malarstígur sem helst minnir á kindagötu. Það virðist nóg handa gangandi fólki.
• Verðlag hér er eins og í London, alveg það sama og heima. Hef enn ekki rekist á neitt sem er ódýrara hérna. Allt sem inniheldur sykur er hins vegar óheyrilega dýrt!
• Matvöruverslanir hér eru sér kapítuli. Held ég hafi sér pistil um þær.
• Reglur eru reglur og það á að fara eftir þeim! Galtóm gata með engri umferð er vís með að hafa hóp af fólki uppi á gangstétt að bíða eftir græna kallinum.
• Götur eru tómar eftir vinnutíma. Fólk virðist fara heim og halda sig þar. Ég hef hjólað heim eftir stofnæð um 18:30 og umferðin var svipuð og maður býst við í íbúðagötu snemma á sunnudagsmorgni.
• Danir flokka ekki rusl og hvergi örlar á hvatningu til þess.

Inngangurinn heima hjá mér á Viggo Jarls vej í Virum.

Skrýtnir Bretar

Nú er ég búin að eyða 3 vikum í Bretlandi og komin yfir til Danmerkur. Í Bretlandi rakst ég á ýmislegt sem er öðruvísi en maður á að venjast:

• Gangbrautaljós á gatnamótum eru eingöngu til skrauts. Græni kallinn þýðir eins og á Íslandi að það megi ganga yfir en rauði kallinn þýðir bara að það eigi að stoppa ef það er augljóst að annars verði keyrt yfir þig. Þetta á við hvort sem börn eru með í för eða ekki.
• Zebrabrautir eru galdratæki. Maður þarf ekki annað en að gjóa augunum í áttina að þeim og þá stöðva allir!  (Nota Z viljandi. S í Zebra bara virkar ekki!)
• Eggjaskerar eru óþekkt fyrirbæri. Búin að fara í ómældan fjölda verslana en hvergi eru eggjaskerar. Alveg ný upplifun hjá mér að sneiða egg ofan á brauð með eldhúshníf!
• Hver og einasti Breti er fullfær um að keppa í göngu á Ólympíuleikum. Í London er mikið gengið og fólkið er búið að koma sér upp gríðarlegum gönguhraða. Sniglar eins og ég eru því mjög gjarna fyrir á gangstéttum.
• Annað hvort eru Bretar alltaf að flýta sér eða þeir kunna ekki að ganga rólega. Sjá næsta lið hér fyrr ofan.
• Þeir flokka allt í frumeindir og það er ekkert skilagjald á umbúðum.
• Verðlag í London er nákvæmlega það sama og á Íslandi. Eina mögulega ástæðan fyrir að fara til London til að versla væri aukið vöruúrval. Svo er líka mjög auðvelt að versla þar fyrir ljótufatadag í vinnunni. J

Tilgangurinn með þessu öllu saman

Meiningin er að setja hér inn fréttir af okkur Sigga og flækingnum á okkur um heiminn. Kannski fá að fylgja líka bollaleggingar um það sem fyrir augu ber og hvað okkur finnst um það.

Úr í búðinni í Croydon, Englandi

Næstu mánuðir verða forvitnilegir. Siggi býr og starfar í London en ég verð við mastersnám í Danmörku. Siggi starfar hjá fyrirtæki sem heitir Vyre Ltd og er í miðborg Lundúna. Ég er hins vegar í skóla sem er kallaður DTU (Danmarks Teckniske Universitet) og er í Lyngby sem er á stór-Kaupmannahafnarsvæðinu. Vonandi verður Siggi duglegur að vinna svo við höfum efni á að skjótast á milli stöku helgi.

Beðið eftir mat á pöbbanum.